Xəbərlər

Təhsil işçilərinin Şəkiyə maarifləndirici və istirahət səfəri

Elm və Təhsil İşçiləri Həmkarlar İttifaqı Ağdam Rayon Komitəsinin təşkilatçılığı ilə 01 iyun 2026-cı il tarixdə Ağcabədi rayonunda yerləşən Ağdam rayonunun 45 nömrəli tam orta ümumtəhsil məktəbinin kollektivi asudə vaxtlarının səmərəli təşkili və kollektiv ruhun gücləndirilməsi məqsədilə Şəki şəhərinə maarifləndirici və istirahət xarakterli tur həyata keçirmişdir.

Səfər çərçivəsində iştirakçılar Şəki şəhərinin füsunkar təbiəti, tarixi-mədəni abidələri və bölgənin zəngin turizm imkanları ilə yaxından tanış olmuşlar. Tur zamanı kollektiv üzvləri Şəkinin ən məşhur tarixi-memarlıq abidələrindən biri olan Şəki Xan Sarayını ziyarət etmiş, sarayın zəngin tarixi, memarlıq xüsusiyyətləri və mədəni əhəmiyyəti barədə məlumat əldə etmişlər. Həmçinin iştirakçılar Şəki Yaylasında olmuş, bölgənin əsrarəngiz təbiətindən və təmiz dağ havasından zövq almışlar.

Eyni zamanda, bu tur təhsil işçilərinin asudə vaxtlarının səmərəli və mənalı təşkili, kollektiv üzvləri arasında qarşılıqlı ünsiyyətin və əməkdaşlıq ruhunun daha da möhkəmləndirilməsi baxımından əhəmiyyətli olmuşdur. Bu cür tədbirlər pedaqoji kollektiv arasında həm əməkdaşlıq ruhunun möhkəmlənməsinə, həm də motivasiyanın yüksəlməsinə töhfə verir.

Uşaqların Beynəlxalq Müdafiəsi Gününə həsr olunmuş tədbir təşkil olunub

Elm və Təhsil İşçiləri Həmkarlar İttifaqının Ağdam Rayon Komitəsi ilə Ailə, Qadın və Uşaq Problemləri üzrə Dövlət Komitəsinin tabeliyində olan Ağdam Uşaq və Ailələrə Dəstək Mərkəzi tərəfindən 01 iyun 2026-cı il tarixində Quzanlı köçkün qəsəbəsində fəaliyyət göstərən Əlağalı kənd Mədəniyyət evində 1 İyun – Uşaqların Beynəlxalq Müdafiəsi Günü münasibətilə tədbir keçirilib.

Tədbirdə Mərkəzin direktoru Şəbnəm İbrahimova, Elm və Təhsil İşçiləri Həmkarlar İttifaqının Ağdam Rayon Komitəsinin mühasibi Əmrah Qafarlı, məktəblilər, valideynlər və icma sakinləri iştirak ediblər.

Tədbirdə çıxış edənlər iştirakçıları bayram münasibətilə təbrik edərək, ölkəmizdə uşaq hüquqlarının qorunması istiqamətində görülən işlərdən bəhs ediblər. Tədbirdə məktəblilər arasında keçirilmiş “Ən yaxşı ssenari” müsabiqəsinin I, II və III yerlərin qalibləri və müsabiqədə iştirak edən digər məktəblilər fəal iştiraklarına görə təşəkkürnamələrlə təltif ediliblər.

Daha sonra müsabiqənin qalibi olan Soltanbud kənd tam orta məktəbinin şagirdləri tərəfindən “Ailə dəyərlərinin təbliği” mövzusunda yazılmış ssenari səhnələşdirilərək iştirakçılara təqdim olunub. Səhnəcik tamaşaçılar tərəfindən maraqla qarşılanıb.

Yekunda müsabiqənin qaliblərinə Elm və Təhsil İşçiləri Həmkarlar İttifaqının Ağdam Rayon Komitəsi tərəfindən hədiyyələr təqdim edilib.

Müəllimə Ehtiram, Əməyinə Dəyər

Ağdam rayonu Soltanbud kənd tam orta ümumtəhsil məktəbinin müəllimi Səmədov Əbülfət Məhəmməd oğlunun 65 yaşı tamam olması münasibətilə tədbir keçirilib.

Tədbir zamanı səmərəli pedaqoji fəaliyyətinə görə Səmədov Əbülfət Məhəmməd oğluna Elm və Təhsil İşçiləri Həmkarlar İttifaqı Ağdam Rayon Komitəsi tərəfindən fəxri fərman və hədiyyə təqdim olunub.

Tədbirdə məktəb direktoru, müəllimlər iştirak edərək bu cür tədbirlərin onlara böyük ruh yüksəkliyi verdiyini, fəaliyyətlərində əlavə həvəs yaratdığını vurğuladılar. Müəllimlərimizin əməyini qiymətləndirmək, onların hörmətini uca tutmaq bizim vəzifəmizdir.

65 İllik Şərəfli Ömür Yolu

Ağdam rayonu Xındırıstan kənd tam orta ümumtəhsil məktəbinin müəllimi Cəfərov İlhami Qamboy oğlunu 65 illik yubileyi münasibətilə təbrik etdik. Müəllimimizə fəxri fərman və hədiyyə təqdim olundu.

Tədbirdə məktəb direktoru, müəllimlər iştirak edərək bu cür tədbirlərin onlara böyük ruh yüksəkliyi verdiyini, fəaliyyətlərində əlavə həvəs yaratdığını vurğuladılar. Müəllimlərimizin əməyini qiymətləndirmək, onların hörmətini uca tutmaq bizim vəzifəmizdir.

“Təhsildə şəffaflıq gələcəyimizin təminatıdır” mövzusunda maarifləndirici tədbir.

Ağdam rayon təhsil sektoru və Elm və Təhsil İşçiləri Həmkarlar İttifaqı Ağdam Rayon Komitəsinin birgə təşkilatçılığı ilə Ağdam rayon 135 nömrəli tam orta ümumtəhsil məktəbində “Korrupsiyaya yox deyək” devizi altında maarifləndirici tədbir keçirilib.

Tədbirdə çıxış edən Ağdam rayon təhsil sektorunun müdiri Tahir Abbasov, Elm və Təhsil İşçiləri Həmkarlar İttifaqı Ağdam Rayon Komitəsinin sədri Tamerlan Hüseynov, Ağdam Rayon İcra Hakimiyyəti Başçısı Aparatının hüquq və kadr məsələləri sektorunun müdiri Baxşalıyev Şirxan Məhəmməd oğlu korrupsiyanın cəmiyyətə vurduğu zərərlərdən, şəffaflığın və qanunlara hörmətin vacibliyindən danışıblar. Bildirilib ki, korrupsiyaya qarşı mübarizə hər bir vətəndaşın məsuliyyəti olmaqla yanaşı, sağlam və ədalətli cəmiyyətin formalaşmasının əsas şərtlərindən biridir. Xüsusilə təhsil sahəsində şəffaflığın qorunması, müəllim-vətəndaş münasibətlərində dürüstlük prinsiplərinin təşviqi və gənc nəslin hüquqi maarifləndirilməsi mühüm əhəmiyyət daşıyır.

Tədbirdə müxtəlif təhsil müəssisələrindən məktəb direktorları, müəllimlər və digər təhsil işçiləri olmaqla ümumilikdə 97 nəfər iştirak edib.

65 illik yubiley münasibətilə görüş keçirilib

Elm və Təhsil İşçiləri Həmkarlar İttifaqı Ağdam Rayon Komitəsinin təşkilatçılığı ilə Ağdam rayon Ayaz Abbasov adına Qaradağlı kənd tam orta ümumtəhsil məktəbinin uzun illər pedaqoji fəaliyyət göstərən müəllimi İmanova Nəsibə Polad qızının 65 illik yubileyi münasibətilə tədbir keçirilib.

Tədbirdə çıxış edənlər Nəsibə müəllimənin təhsil sahəsindəki çoxillik səmərəli fəaliyyətindən, şagirdlərin savadlı və vətənpərvər ruhda formalaşmasında göstərdiyi xidmətlərdən danışaraq onun kollektiv və ictimaiyyət arasında böyük hörmət qazandığını vurğulayıblar. Bildirilib ki, Nəsibə müəllimənin zəngin pedaqoji təcrübəsi və müəllim peşəsinə olan sədaqəti gənc nəslin yetişməsində mühüm əhəmiyyət daşıyır.

Yubiley münasibətilə İmanova Nəsibə Polad qızı Elm və Təhsil İşçiləri Həmkarlar İttifaqı Ağdam Rayon Komitəsi tərəfindən fəxri fərman, gül dəstəsi və xatirə hədiyyəsi ilə təltif olunub.

Sonda yubilyara möhkəm can sağlığı, uzun ömür, ailə xoşbəxtliyi və gələcək həyatında uğurlar arzulanıb.

65 illik ömür yolu

Elm və Təhsil İşçiləri Həmkarlar İttifaqı Ağdam Rayon Komitəsi tərəfindən Ağdam rayon Sahib Həsənov adına Əfətli kənd tam orta ümumtəhsil məktəbinin uzunillik pedaqoji fəaliyyət göstərən müəllimi Bağırova Ziyafət İldırım qızının 65 illik yubileyi münasibətilə görüş keçirilib.

Tədbirdə çıxış edənlər Ziyafət müəllimənin təhsil sahəsində göstərdiyi səmərəli fəaliyyətindən, şagirdlərin bilik və tərbiyəsindəki xidmətlərindən, kollektiv arasında qazandığı böyük hörmət və nüfuzdan bəhs ediblər. Qeyd olunub ki, onun illərlə təhsil sahəsinə verdiyi töhfələr gənc nəslin formalaşmasında mühüm rol oynayıb.

Yubiley münasibətilə Bağırova Ziyafət İldırım qızı Elm və Təhsil İşçiləri Həmkarlar İttifaqı Ağdam Rayon Komitəsi tərəfindən fəxri fərman, gül dəstəsi və qiymətli hədiyyə ilə təltif olunub.

Sonda yubilyara möhkəm can sağlığı, uzun ömür, ailə səadəti və gələcək fəaliyyətində yeni uğurlar arzulanıb.

Ağdamda Ulu öndər Heydər Əliyevin anadan olmasının 103 illiyinə həsr olunmuş tədbir keçirilib.

10 may 2026-cı il tarixdə Ulu Öndər Heydər Əliyevin anadan olmasının 103 illiyinə həsr olunmuş tədbir keçirilib. Rəsmi və bədii hissədən ibarət tədbirdə Rayon İcra Hakimiyyətinin başçısı Vaqif Həsənov, YAP Ağdam rayon təşkilatının sədri Mansur Quliyev, Ağdam Təhsil sektorunun müdiri Tahir Abbasov, Elm və Təhsil İşçiləri Həmkarlar İttifaqı Ağdam Rayon Komitəsinin sədri Tamerlan Hüseynov, hüquq mühafizə orqanlarının, idarə, müəssisə və təşkilatların rəhbərləri, şəhid ailələri, qazilər və ictimaiyyət nüməyəndələri iştirak etmişlər. Tədbir iştirakçıları əvvəlcə Ulu öndər Heydər Əliyevin mərkəzi meydanda ucaldılmış abidəsini ziyarət etmiş, önünə gül dəstələri düzmüşlər. Ağdam Muğam Mərkəzində baş tutan rəsmi hissədə iştirakçılar Ulu öndərin müxtəlif vaxtlarda Ağdam rayonuna etdiyi səfərlərdən bəhs edən foto və kitab sərgisi ilə tanış olub, daha sonra Dövlət Himninin səsləndirilməsi ilə tədbir açıq elan edilib. Əvvəlcə Ulu öndərin həyat və siyasi fəaliyyətinə həsr edilmiş “Xalqa həsr olunmuş ömür” adlı filim tədbir iştirakçılarına nümayiş etdirilmişdir. Ümummilli lider Heydər Əliyevin həyat və fəaliyyəti haqqında məruzə ilə çıxış edən Rayon İcra Hakimiyyətinin başçısı Vaqif Həsənov Ulu öndərin öz xalqını zamanın mürəkkəb tarixi-siyasi sınaqlarından uğurla çıxarmasından və ardıcıl mübarizə apararaq onu müstəqilliyə qovuşduran qüdrətli şəxsiyyət olmasından söhbət açmış, Azərbaycan xalqının yeni əsrə və yeni minilliyə məhz Heydər Əliyev zəkasının işığında qədəm qoymasından bəhs etmişdir. Tədbirin bədii hissəsində Ağdam Musiqi Kollecinin “Qarabağ” instrumental ansamblının müşayiəti ilə Azərbaycan Respublikasının əməkdar artisti Fehruz Səxavətin və kollecin müəllim və tələbələrinin təqdimatında xalq və bəstəkar mahnılarından ibarət musiqi nömrələri tədbir iştirakçılarına təqdim edilmişdir.

Ümummilli Lider Heydər Əliyevin anadan olmasının 103-cü ildönümünə həsr olunmuş məktəblilərarası intellektual bilik yarışı keçirilib.

Ağdam şəhəri 1 nömrəli tam orta ümumtəhsil məktəbində Ümummilli lider Heydər Əliyevin anadan olmasının 103-cü ildönümünə həsr olunmuş məktəblilərarası intellektual bilik yarışı keçirilib.

Yarışdan əvvəl Azərbaycan Respublikasının Dövlət Himni səsləndirilib, Ulu Öndərin və şəhidlərin əziz xatirəsi bir dəqiqəlik sükutla yad edilib.

İdarə müdiri çıxış edərək iştirakçıları salamlayıb, onlara uğurlar arzulayıb və belə tədbirlərin şagirdlərin bilik və bacarıqlarının inkişafında mühüm rol oynadığını vurğulayıb. O, iştirakçıları fəal olmağa və ədalətli mübarizə aparmağa səsləyib.

Məktəblilərarası intellektual bilik yarışının keçirilməsində əsas məqsəd, ümumtəhsil müəssisələrində təhsil alan şagirdlərdə fənlərin dərindən öyrənilməsinə marağın artırılması, onların dünyagörüşünün genişləndirilməsi, sağlam rəqabət mühitinin formalaşdırılması, müxtəlif rayonlardan olan şagirdlər arasında dostluq əlaqələrinin qurulması və ümumilikdə, öyrənməyə təşviq etməkdən ibarətdir. 

Sualların müxtəlif istiqamətdə olması iştirakçıların təkcə biliyini deyil, məntiqi təfəkkürünü və yaradıcı yanaşma bacarıqlarını üzə çıxarır. Komanda tərkibi rayon və şəhərlərə görə ümumilikdə yeddi rayon üzrə müəyyən olunmuş və hər komandada 6 nəfərdən ibarət şagird iştirak etmişdir.

Qiymətləndirmə münsiflər heyəti tərəfindən aparılmış, ən yüksək nəticə göstərən üç komanda qalib elan edilmişdir. Belə ki, I yerə layiq görülən Ağcabədi rayonu üzrə komanda kubok və diplomla təltif olunmuş, II yeri Xankəndi şəhəri üzrə komanda, III yeri isə Ağdam rayonu üzrə komanda tutmuşdur. II və III yerlərin sahibləri diplomlarla mükafatlandırılmışdır.

Ağdam rayonunda təhsil sahəsində qürurverici uğurlar davam edir.

Ağdam rayon 2 nömrəli tam orta məktəbin XI sinif şagirdi Həsənzadə Emin Anar oğlu Respublika Fənn Olimpiadalarının final mərhələsində biologiya fənni üzrə Qızıl medal qazanaraq böyük nailiyyət əldə etmişdir. Eminin bu uğuru illər boyu davam edən zəhmətin, məqsədyönlü hazırlığın və güclü iradənin parlaq nəticəsidir. O, əvvəlki illərdə də yüksək nəticələri ilə seçilərək:

🔹 VIII sinifdə ölkə üzrə III yer

🔹 IX sinifdə Qızıl medal 🥇

🔹 X sinifdə Gümüş medal 🥈

🔹 XI sinifdə yenidən Qızıl medal 🥇 qazanmışdır.

Eyni zamanda, Ağdam rayon 35 nömrəli tam orta məktəbin 9 “B” sinif şagirdi Göyçək Mancanlı da Respublika Fənn Olimpiadalarının final mərhələsində Azərbaycan dili və ədəbiyyat fənni üzrə yüksək nəticə göstərərək Gümüş medala layiq görülmüşdür.

Bu nailiyyətlər bir daha göstərir ki, uğur yalnız istedadın deyil, həm də zəhmətin, əzmin və düzgün istiqamətləndirmənin nəticəsidir. Şagirdlərin bu səviyyəyə yüksəlməsində onların üzərində böyük əməyi olan müəllimlərin rolu danılmazdır. Eyni zamanda, hər zaman övladlarının yanında olan və onlara dəstək verən valideynlərə də dərin minnətdarlığımızı bildiririk.

Əziz Emin və Göyçək, sizi ürəkdən təbrik edir, gələcək həyatınızda daha böyük uğurlar və yeni zirvələr arzulayırıq!

Ağdamda Ulu Öndərin 103-cü ildönümünə həsr olunmuş mini futbol turniri yekunlaşdı.

Ümummilli Lider Heydər Əliyevin anadan olmasının 103-cü ildönümünə həsr olunmuş təhsil işçiləri arasında mini futbol turniri yüksək səviyyədə təşkil olunaraq uğurla yekunlaşdı.

Elm və Təhsil İşçiləri Həmkarlar İttifaqı Ağdam Rayon Komitəsinin təşkilatçılığı ilə keçirilən bu mötəbər idman tədbirinin əsas məqsədi Ulu Öndərin zəngin irsinin təbliği, təhsil işçiləri arasında sağlam həyat tərzinin təşviqi, komanda ruhunun gücləndirilməsi və qarşılıqlı dostluq münasibətlərinin daha da inkişaf etdirilməsi olmuşdur.

Yarış boyu müşahidə olunan sağlam rəqabət və idman ruhu tədbirin əhəmiyyətini daha da artırmışdır.

Yarışın nəticələrinə əsasən qaliblər aşağıdakı kimi müəyyənləşmişdir:

🥇 Ağdam Rayon Musiqi Kolleci

🥈 Ağdam rayon Quzanlı-1 qəsəbə tam orta ümumtəhsil məktəbi

🥉 Ağdam Rayon üzrə Təhsil sektoru

Qalib komandalar kubok, medal və dəyərli hədiyyələrlə təltif olunmuşdur.

Ağdam Rayon Təhsil sektorunun müdiri Tahir Abbasov və Elm və Təhsil İşçiləri Həmkarlar İttifaqı Ağdam Rayon Komitəsinin sədri Tamerlan Hüseynov çıxış edərək turnirin əhəmiyyətini xüsusi vurğulamış, qalib komandaları səmimi-qəlbdən təbrik etmiş, onlara qazandıqları nailiyyətlər münasibətilə mükafat və hədiyyələrini təntənəli şəkildə təqdim etmişlər. Çıxışlarda iştirakçıların nümayiş etdirdiyi yüksək idman ruhu, birlik və həmrəylik xüsusi qeyd olunmuş, bu cür tədbirlərin davamlı keçirilməsinin vacibliyi diqqətə çatdırılmışdır.

Ağdamda Azərbaycanın Milli Qəhrəmanı Baxşeyiş Paşayevin 90 illik yubileyi qeyd edilib

01 may 2026-cı il tarixdə Ağdam Muğam Mərkəzində Azərbaycanın Milli Qəhrəmanı Baxşeyiş Paşayevin 90 illik yubileyi qeyd edilib.Tədbirdə Rayon İcra Hakimiyyətinin başçısı Vaqif Həsənov, aparatın əməkdaşları, YAP Ağdam rayon təşkilatının sədri Mansur Quliyev, Elm və Təhsil İşçiləri Həmkarlar İttifaqı Ağdam Rayon Komitəsinin sədri Tamerlan Hüseynov, Milli Qəhrəmanın ailə üzvləri, döyüş yoldaşları, şəhid ailələri, qazilər iştirak ediblər. Tədbir Dövlət Himninin səsləndirilməsi ilə başlamış, ölkəmizin ərazi bütövlüyü və suverenliyi uğrunda şəhid olmuş Vətən övladlarının və Ulu öndər Heydər Əliyevin əziz xatirəsi bir dəqiqəlik sükutla yad edilmiş, onların ruhuna dualar oxunmuşdur. Tədbirdə Milli Qəhrəmanın döyüş yolundan bəhs edən videoçarx nümayiş etdirilib. Çıxış edən Rayon İcra Hakimiyyətinin başçısı Vaqif Həsənov və digər natiqlər Baxşeyiş Paşayevin Azərbaycanın müstəqilliyi uğrunda qəhrəmanlıqla mübarizə aparmasından, xalqımızın azadlığını hər şeydən uca tutmasından, bu yolda həyatını qurban verərək ən uca zirvəyə-Şəhidlik məqamına ucalmasından bəhs etmişlər. Sonda Milli Qəhrəmanın ailə üzvləri çıxış edərək şəhid ailələrinə göstərilən diqqət və qayğıya görə ölkə Prezidenti cənab İlham Əliyevə öz minnətdarlıqlarını bildirmişlər. Tədbirdən sonra Milli Qəhrəmanın məzarı ziyarət olunub.